Sembrama Wecana ring Pawiwahan

Om Swastyastu,

1.      Ida Pedanda Gdé Nyoman Jelantik Dwaja sang maraga suci sané dahat singgihang titiang.

2.      Palungguh Bapak Bupati I Wayan Geredeg, SH., murdaning jagat Karangasem sané dahat wangiang titiang.

3.      Bapak Camat Drs. I Wayan Ardika, M.Si., sané mustikayang titiang.

4.      Bapak Prebekel Désa Tiyingtali sane kusumayang titiang.

5.      Kliang Banjar Dinas Tumingal sané suksmayang titiang.

6.       Kliang Désa Pakraman Tumingal miwah angga sané wangiang titiang.

7.      Ida Dané para sameton undangan lanang istri duuran alitan sané taler wangiang titiang.

8.      Utaminipun sang sané pacang mawiwaha sané tresna asihin titiang.

Maka purwaning atur, lugrayang titiang pinaka sang madrebé karya yadnya ngaturang angayubagia pisan majeng ring Ida Sang Hyang Widhi Wasa, santukan sampun majanten sangkaning asung kertha wara nugrahan Ida, ring subha dewasa sané mangkin Ida Dané sareng sami prasida mapupul iriki aturin titiang ngupasaksi miwah ngastitiang upacara pawiwahan sang sané pacang alaki-rabi, mogi-mogi sang kalih prasida lanus kapungkur wekas, rahayu sidaning don sakadi pangaptiné.

Ida Dané miwah sameton sareng sami sané wangiang titiang.

Maka atur panyembraman titiang, pinih riin titiang ngaturang dahat suksmaning manah antuk sapangrauh Ida Dané sameton sareng sami, duaning sampun prasida nagingin mungguing atur pinunas titiang malarapan antuk séwala patra sané sampun katur ring Ida Dane sameton sareng sami. Tiosan ring punika, titiang nénten lali taler nglungsur agung rena pangampura antuk kawéntenan titiang sapuniki, sampun majanten genah payadnyan titiang kosekan sapunika taler banget titiang tuna miwah kirang ring sajeroning nyanggra Ida Dané sameton sareng sami, punapi malih antuk genah titiang puniki nénten nganutin tata linggih sané becik, tiosan ring punika ri tatkala titiang mapangiring taler wénten atur titiang kalintang kaon nénten prasida nganutin basa basita sané becik miwah patut.

Ring  subha déwasa sané mangkin, patut atur uningayang titiang mangda para undangan pawikan, mungguing sang sané jagi mawiwaha mangkin, ipun sané kapurusa mawasta I Kadek Widiantana, ipun sané mangkin makarya pinaka dosén honorér ring Kampus IHDN Denpasar, alaki rabi ring ipun sané predana mawasta Ni Wayan Apriani, ipun pinaka dosén tetap ring STKIP Agama Hindu Amlapura.

Mungguing pamargi yadnya sané sampun kamargiang pinaka bebacakan manut Grhasta Asrama inggih punika kapertama, sampun ngamargiang dharma suaka ring kulawarga wadoné, raris pitung rahina sané lintang sampun taler ngmargiang papadikan, wusan punika kamargiang upacara makalan-kalan, raris ring rahinané sané mangkin, rahina Soma Umanis wuku Sungsang, pinanggal kaping pitu, tanggal 18 wulan Maret warsa 2013 pacang kalaksanayang upacara widhiwidana, makacihna ngadegang Sang Hyang Semara Ratih mangda sang kalih prasida kadirgayusan ngwangun pumahan, mawinan prasida ngembasang pratisentana, putra-putri sané sadu gunawan. Pamargi sané pamuput raris majauman, masuksma ngiket pakulawargan sang kalih maduluran antuk makta tipat bantal ring kulawarga predana. Wusan punika puput sampun sapulah-palih ri sajeroning upacara manusa yadnya titiang manut sekala miwah niskala inggian sampun ngamargiang Tri Upaksaksi, minakadi Déwa Saksi, Butha Saksi, miwah Manusa Saksi.

Ida Dané miwah sameton sareng sami sané wangiang titiang.

Asapunika nganinin indik Upacara Manusa Yadnya sané kamargiang, mogi-mogi sapangrauh Ida Dané sameton sareng sami, ri tatkala nyaksiang maduluran ngrastitiang sané becik, prasida raris ipun sang kalih manggihin karahayuan.

Sadurung titiang muputin atur, Ida Dane sareng sami aturin titiang masandekan riin duaning  jagi katuran anyita bhoga samatra. Inggih wantah sakadi asapunika mungguing atur panyembraman titiang, manawi ta wénten kirang langkung antuk titiang matur, titiang nunas pangampura. Makawesananing atur puputin titiang antuk parama santih.

Om Santih, Santih, Santih, Om.

NB: Kabaktayang ring Kampus IHDN Denpasar, sajroning Mata Kuliah Kawagedan Mabaos Bali. Katuréksa olih Dr. I Nyoman Suwija, M.Hum.

Sambrama Wacana Sisia Kelas VI

SAMBRAMA WACANA

 PERPISAHAN SISIA KELAS VI SDN 3 TIYINGTALI

WAKIL SAKING SISIA KELAS VI

Inggih suksma antuk galah sane sampun kaicén majeng ring déwék titiang, antuk nagingin sambrama wacana perwakilan saking sisia kelas VI puniki.

Dané Jro Mangku Sané Dahat Suciang Titiang

Bapak Kepala Désa Sané Dahat Wangiang Titiang

Bapak Kepala Sekolah SDN 3 Tiyingtali Sané Mustikayang Titiang

Bapak Ketua Komité miwah Stafnyané Sané Kasumayang Titiang

Bapak miwah Ibu Guru SDN 3 Tiyingtali sané Baktinin Titiang

Nénten Lali Para Semeton Titiang Kelas VI miwah Adin Titiang Kelas I Kantos Kelas V Sané Tresna Asihin Titiang

Angayubagia titiang uningayang majeng ring Ida Sang Hyang Widhi Wasa, duaning sangkaning asung kerta wara nugrahan Ida, mawinan titiang prasida molih karahajengan makunyit di alas, matemu ring Ida Dané Sameton sareng sami ring acara perpisahan sekolah sisia kelas VI puniki. Sadurung titiang nglanturang matur samatra, sané mangkin lugrayang titiang ngojarang pangastungkara, Om Swastiastu.

Inggih Bapak Kepala Sekolah miwah Bapak/Ibu Guru sané Wangiang Titiang.

            Sasampun enem warsa titiang nunas paplajahan iriki ring SD Negeri 3 Tiyingtali, sané mangkin sampun panemaya titiang patut mapamit, jagi ninggalin Bapak miwah Ibu saha sameton sinamian. Ring galahé sané becik puniki, wantah suksmaning manah sané prasida aturang titiang majeng ring Bapak Kepala Sekolah miwah para guruné makasami, santukan lédang arsa pinaka pahlawan tanpa tanda jasa, mapaica paplajahan majeng ring muridé makasami, pamekas sikian titiang sané tuna puniki.

            Antuk gargitan manah titiang, sampun prasida tamat ring SD kadi mangkin, sajaba rasa suksma, nénten lali taler titiang nunas agung rena pangampura mantuk ring katambetan titiang, ampura ping banget taler pét pradé akéh kaiwangan titiang ri tatkala nyanggra paplajahan saking Bapak miwah Ibu guru sinamian.

Inggih Bapak Kepala Sekolah miwah Bapak/Ibu Guru sané Wangiang Titiang.

            Mangkin titiang pacang mapajar samatra mantuka ring sameton titiang kelas VI makasami. Inggih, sameton titiang kelas VI sinamian, riantukan iraga puniki kantun ali-alit, patutné nénten waneh-waneh sajeroning malajahang déwék, antuk ngalanturang ring jenjang pendidikan SMP. Titiang nunas, ring dija ja sameton polih masekolah, mangda kantun satya ring pituduh guruné pinaka anggén sameton miara nama baik sekolah iragané puniki.

           

            Raris majeng ring adin-adin titiang kelas I kantos kelas V, titiang ngaturang piteket samatra, mangda makasami prasida susatya ring pituduh guru, saha nincapang pangweruhan antuk selegang malajah, mangda dados anak dueg tur maprestasi. Taler mangda mrasidayang makarya kaledangan kayun Bapak miwah Ibu guru.

Inggih Bapak Kepala Sekolah miwah Bapak/Ibu Guru, miwah Sameton Sinamian sané Wangiang Titiang

            Wantah sakadi asapunika titiang prasida matur ring galah sané becik puniki. Suksma banget uningayang titiang, jukut kangkung sambel sera, kirang langkung titiang nunas pangampura. Puputang titiang antuk ngojarang parama santih, Om, Santih, Santih, Santih Om.

Sambrama Wacana Sisia Kelas V

SAMBRAMA WACANA
PARIKRAMA PERPISAHAN SISIA KELAS VI SDN 3 TIYINGTALI

WAKIL  SAKING SISIA KELAS V

Inggih suksma antuk galah sane sampun kaicén majeng ring déwék titiang, antuk nagingin sambrama wacana perwakilan saking kelas V puniki.

Dané Jro Mangku Sané Dahat Suciang Titiang

Bapak Kepala Désa Sané Dahat Wangiang Titiang

Bapak Kepala Sekolah SDN 3 Tiyingtali Sané Mustikayang Titiang

Bapak Ketua Komité miwah Stafnyané Sané Kasumayang Titiang

Bapak miwah Ibu Guru SDN 3 Tiyingtali sané Baktinin Titiang

Nénten Lali Kakan Titiang Kelas VI, Adi miwah Sameton Titiang Kelas I Kantos Kelas V Sané Tresna Asihin Titiang

Garjita dahat manah titiang ring rahinané sané mangkin, duaning kapaica galah jagi anggén titiang matur samatra ngeninin indik acara perpisahanné puniki. Santukan wau malajah, ampurayang pisan indik kakirangan atur titiang. Sakéwanten sadurung titiang nglanturang matur, ngiring sané mangkin nénten ja surud-surud ngaturang parama suksma majeng ring linggih Ida Sang Hyang Widhi Wasa, malarapan antuk ngojarang pangastungkara.

 Om Swastiastu,

Inggih Bapak Kepala Sekolah miwah Bapak/Ibu Guru sané Wangiang Titiang

            Acara perpisahan inggih punika gumanti acara sané rutin kalaksanayang nyabran ngwarsa. Mungguing suksmanné wantah nyihnayang prosés pendidikan-né sampun mamargi antar tur labda karya. Punika sampun nyihnayang Bapak lan Ibu guru sampun prasida sidaning don sajeroning ngamel wasta pahlawan tanpa tanda jasa, sakadi atur belin titiangé (Kelas VI) i wau. Duaning guru punika wantah sane patut digugu lan ditiru, gumanti pinaka dados tatuladan sajeroning ngmargiang swadharma ring sekolah.

Nglantur, titiang ngaturang suksma majeng ring pabesenné utawi piteketné i wau, dumogi ja malarapan antuk pasuécan Ida Sang Hyang Aji Saraswati, titiang sareng sareng sami prasida nincapang pangweruh, turmaning mangda seleg tur jemet malajah, mangdané napi sané kaaptiang prasida kapikolih. Tiosan ring punika, dumogi titiang satata susatya ring baos miwah pituduh Bapak lan Ibu guru.

Inggih Bapak Kepala Sekolah, Bapak/Ibu Guru miwah Sameton Sareng Sami sané Wangiang Titiang

            Sane mangkin Beli lan Mbok sareng sami sampun kawastanin tamat saking sekolah iraga sane tresnain puniki. Titiang nunas majeng ring Beli lan Mbok sané pacang nglanturang masekolah ka jenjang SMP, mangda satata seleg malajah, sampunang pisan purun piwal ring sapituduh guru tur satata ngulati kalédangan kayun Bapak lan Ibu guru genah sekolah druené. Sapunika taler majeng ring Beli lan Mbok sané nénten nglanturang masekolah, mangda taler malajah, inggih punika ring masyarakat. Ajah-ajah napi sané sampun polih ring sekolah mangda kawigunayang sajeroning mapaayah-ayah ring masyarakat.

Inggih Bapak Kepala Sekolah, Bapak/Ibu Guru miwah Sameton Sareng Sami sané Wangiang Titiang

            Inggih sakadi asapunika prasida antuk titiang matur nagingin galah sambrama wacana puniki. Pét pradé sajeroning titiang matur, wénten atur titiang sané nénten manut sajeroning arsa Ida Dane Sameton Sami, antuk punika lugrayang titiang nunas agung rena pangampura. Pinaka pamuput atur titiang sineb antuk parama santih.

Om, Santi, Santih, Santi Om.