Tri Angga miwah Tri Mandala sajroning Wewangunan

Wewangunan ring wewidangan jagat Bali kamanggehang patut kawangun antuk wentuk miwah cihna kabudayan Bali. Soang-soang wewangunan jana Baliné nganutin ring Tri Angga, wantah tigang paletan ri sajroning wewangunan, luiré; Utama Angga, Madya Angga, miwah Nista Angga. Sané kabaos Utama Angga wantah raab wewangunan, raris Madya Angga wantah angga wewangunan sané kawentuk antuk saka miwah temboknyané, samaliha Nista Angga wantah batur utawi dasar wewangunan. Mawinan wewangunan sané becik miwah patut majanten antuk dasar sané kukuh mangda nénten gelis ipun rusak. Sapunika taler sang nruénang majanten kukuh nénten obah pakayunanipun meneng mapaurip ring wewangunanipun.

Pakarangan paumahan umat Hindu akéhan kaepah dados tigang paletan sané kabaos Tri Mandala, makadi; Utama Mandala, Madya Mandala, miwah Nista Mandala. Utama Mandala wantah pagenahan wewangunan sané masuksma luih, sakadi pemerajaan utawi sanggah, genah pangubaktin jana Bali ring Ida Sang Hyang Widhi miwah para Hyang Dewa Pitara. Madya Mandala wantah pagenahan wewangunan sané madué suksma madya, sakadi genah jana Bali nglaksanayang kahuripan marupa umah kaja, umah kangin, umah kelod (pawaregan), umah kauh, miwah jineng. Nista Mandala wantah pagenahan wewangunan sané suksmanipun nista, sakadi genah kandang bawi, kandang banténg, kandang ayam, kandang bébék, miwah sané lianan taler kawéntenanipun soran ring genah-genah sané ring ajeng.