RAMAYANA DAN MAHABHARATA: SEBUAH RESUME

BAB I

PAMAHBAH

1.1              Wiwilan Nyelehin

Kasusastran Bali wantah marupa tetamian leluur sane dahat mabuat pisan. Manut Tim Penyusun, Dinas Kebudayaan Propinsi Bali (2005: 4), Kasusastran wantah mawit saking kruna sastra, polih pangater su- raris polih konfiks ka-an (n), dados kruna tiron kasusastran. Kruna sastra sane mateges 'ajah-ajah', 'kaweruhan' polih pangater su- sane mateges 'luih', 'becik'. Dadosnyane kruna kasusastran mateges kawentenan ajah-ajah utawi kaweruhan sane luih utawi becik tur mabuat.

Kasusastran Bali manut parinama ring ajeng dadosnyane saluir kaweruhan sane becik sane metu saking budi jenyana para wagmi ring Bali sane kasurat ngangge basa Bali miwah aksara Bali lan Latin. Sakewanten matiosan pidartan Wayan Budha Gautama nampenin indik piteges kasusastran Bali punika. Manut Dane, kasusastran mawit saking basa Sanskerta, saking kruna sastra. Polih pangater "Ka" miwah pangiring "an" dados Kasusastran. Sastra tegesnyane: sas = nyukat-nyikut wiadin ngukur (mengukur), tra = piranti (sarana = alat). Sastra inggih punika aksara piranti ngajahin tetwa, kaweruhan (ilmu). Kasusastran inggih punika palaning reriptayan Ida Sang Kawiswara malarapan antuk pawisik (ilham/wahyu) sane kaiket (dikarang)  basa utawi aksara sane lengut (2007: 2).

Saking makakalih pidarta nampenin indik teges kasusastran Bali punika, prasida titiang nyutetang teges kasusastran Baline. Cutetnyane kasusastran Bali inggih punika saluiring pangweruh sane medal saking pikayunan budi jenyana Ida Sang Kawiswara malarapan antuk pawisik sane kaiket antuk basa utawi aksara sane lengut tur dagingnyane marupa ajah-ajah, tutur-tutur sane luihing utama, sane nganggen basa Bali miwah Kawi tur kasurat nganggen aksara Bali miwah Latin sane katami rauh mangkin.

Kasusastran Bali pinaka tetamian saking para leluur iraga madaging pangweruh sane luihing utama tur sida ngwetuang wirasa lengleng ulangun pinaka kamahatmian budaya Baline. Tiosan ring punika, sampun ketah kauningin susastra Bali puniki kanggen sesuluh miwah panuntun nincapang kahuripan ring era globalisasi puniki.

Maosang kasusastran Baline ring aab jagate sakadi mangkin sayuakti manut Wayan Budha Gautama, wantah sampun marupa pasatmian (pacampuhan) saking kasusastran Bali Purwa, kasusastran Jawi, miwah kasusastran Hindu (2007: 4). Kasusastran Bali Purwa inggih punika kasusastran sane wenten pinih riin ring Bali, taler kawastanin "Adi Sastra Parajana" (kasusastran rakyat), sane nenten kasuratang sakewanten karambang turun-temurun tur maurip rauh mangkin. Makacihna gumanti saking riin sampun wenten adikara (kesenian), inggihan punika kacihnayang mawit saking sane munggah ring prasasti Desa Trunyan, kajantenang ngangge warsa isaka 833 (911 Masehi), saha aksarannyane. Aksara Dewanegari tur basanipun basa Bali Kuna. Sesuratannyane sakadi: pamukul (juru tabuh), atapukan (tapel), agending (juru kidung), anuling (juru suling), abanwal (bebanyolan), pirus (badut), aringgit (wayang), miwah menmen (ilen-ilen).

Asapunika sane keni kasuratang kawentenan indik kesenian lan kebudayane ring Bali, tur salanturnyane kaupapira kabecikang pisan, mangda nenten karasayang wenten karanjingin antuk budaya tiosan makadi saking Hindu lan Jawi.  Sakewanten kahanan tur pakibeh jagate sakadi mangkin sayuakti nenten prasida antuk nulak panglimbak kebudayan sane ngranjing ka Bali. Punika mawinan raris kasusastran Baline keni kacampuhin antuk Kasusastran Jawi miwah Hindu.

Kasusastran Jawi sane ngwangun Kasusastran Bali puniki winangun antuk kalih paos, inggih punika: (1) kasusastran Jawi Kuna, miwah (2) kasusastran Jawi Tengahan. Kasusastran Jawi puniki kawentenannyane wantah marupa kasusastran sane kasurat, tur madue uger-uger. Bina ring kasusastran Bali Purwa sane lelimbaknyane sangkaning karambang utawi kaapalang, santukan kasusastran inucap nenten marupa kasusastran sane kasurat. Manut kahanan kalih dagingnyane Kasusastran Jawi Kunane punika mawangun Kakawin (tembang agung = puisi), Gancaran (kakawian bebas = prosa), makamiwah Palawakia (kakawian bebas sane katembangang ri kala ngwacen = prosa liris). Sakewanten Kasusastran Jawi Tengahan, punika lelimbaknyane ring Bali ngawit pamadegan Karaton Gelgel, santukan ngawit irika karauhan tur karanjingan kasusastran Jawi sanen nganggen Basa Kawi Tengahan. Mungguing wangunnyane maendahan minakadi: (1) sane marupa tembang, luire; Sekar Rare, Sekar Macepat, miwah Sekar Madia, (2) sane marupa gancaran, luire; Tantu Pagelaran, Kanda Pat, Tantri Kamandaka, Pararaton miwah makudang-kudang crita.

Kasusastran Hindu taler nyampuhin kawentenan kasusastran Baline, mawinan kahanan miwah kawentenan kasusastran Baline maendahan pisan. "Sadaweg wangsa Hindune rauh ring Bali wiadin ring Nusantara, kasusastran Hindune ring jagat Hindu sampun matuwuh ± 1000 tahun langkung; minakadi pustaka-pustaka sucine, luiripun: Catur Weda, Purana-purana, Wiracerita Ramayana, Mahabharata sane mawangun gita (sloka) kalih gancaran, miwah palawakia". (Gautama, 2007: 12).

Sane nudut manah santukan dahat kaloktah mungguing kawentenan crita inucap inggih punika wantah susastra sane mawasta Ramayana miwah Mahabharata. Susastra Ramayana miwah Mahabharata ketah kabaosang epahan saking itihasa utawi lumbrah kawastanin "wiracarita" (epos kepahlawanan).

Itihasa punika wantah crita kuna sane dagingnyane nyritayang indik kaprawiran lan indik rajaniti  Hindu duke riin. Antuk punika patut pisan kauningin mungguing daging-dagingnyane, mangda prasida ngetus suksmannyane, sane gumanti prasida anggen panuntun ngamargiang swadharma pinaka janma Hindu. Malarapan sangkaning punika, titiang mamanah saha pisereng pacang nyelehin mungguing daging susastra Ramayana miwah Mahabharata punika antuk ngamargiang selehan daging sane ringkes. Mungguing murda sasuratan puniki inggih punika "Susastra Ramayana miwah Mahabharata (Pinaka Selehan Daging sane Ringkes)."

1.2              Reragragan Pikobet

Manut pidartan saking wiwilan nyelehin ring luur, antuk punika prasida karagragang pikobet sakadi ring sor puniki.

1.      Sapunapi daging susastra Ramayana sane mawit saking Kasusastran Hindu?

2.      Sapunapi daging susastra Mahabharata sane mawit saking Kasusastran Hindu?

1.3              Tetujon Nyelehin

Mungguing tetujon nyelehin susastra Ramayan miwah Mahabharata punika inggih punika sakadi ring sor.

1.      Gumanti mangda prasida nguningin daging-daging susastra Ramayana miwah Mahabharata inucap.

2.      Mangda prasida nartayang antuk ringkesan, lamakane prasida sayan resep ring daging kalih suksmannyane.

3.      Santukan ring susastra punika madaging unteng pikayun saking Ida Sang Kawisawara san mautama, majalaran antuk nyelehin daging susastra Ramayana miwah Mahabharata prasida raris anggen tetimbang tur sesuluh midabdabin kahanan uripe sakadi mangkin sane ketah kabaos awor tan pawates.

1.4              Wigunan Nyelehin

Mungguing wigunan nyelehin susastra Ramayana miwah Mahabharata inggih punika sakadi ring sor.

1.      Anggen ngwewehin cakepan nganinin indik kasusastran Bali.

2.      Mangda prasida uning ring daging-daging kamahatmian budaya Baline pinaka ngwerdiang wiadin nglimbakang budaya inucap.

3.      Pinaka anggen ngajinin para pangawi sane sampun mapikolih ngawi susastra sane adi luung.

1.5              Jebar Kekuub

Jebar kekuub puniki matetujon kanggen ngwatesin jimbar selehan puniki. mangda daging selehan puniki prasida kapikolihang manut sakadi pangapti. Punika duaning sangkaning jimbar saha makatah pisan kekuub susastra Baline, samaliha mangda nenten singsal saking pangapti miwah ring pikolih selehan inucap. Antuk punika, jebar kekuub selehan puniki wantah kantos ring nartayang nganinin indik daging susastra Ramayana miwah Mahabharata sane ringkes.

BAB II

DAGING SELEHAN

2.1       Daging Susastra Ramayana

Ramayana miwah Mahabharata sane sampun kaloktah punika wantah kasusastran sane mawit saking Kasusastran Hindu sane pinih asri, sane naut inggihan nudut pakayunan para janane saking riin rauh mangkin.

Yening selehin, kawentenan Kakawin Ramayana punika manut I Gusti Putu Antara (2005: 63), wantah kakawin sane pinih riin karipta ring Nusantara. Kabaos taler, Kakawin Ramayana punika sampun paripurna, santukan sampun ngangge wirama sane saimper (sesuai) kadi sane rauh saking Jagat Hindu. Sabinaning punika, taler sampun manut krama lan tata susilaning Hindu, saha kaanutang ring paindikan Basa Jawi Kunane, taler ring Budaya Jawine. Punika mawinan Kakawin Ramayanane kaangkenin sakadi anjur lumampahing kalangwan (kakawin sane pangawit sane rinipta ring Jagat Nusantara).

Tios malih sane mawasta Gita Ramayana. Manut Wayan Budha Gautama, Ramayana punika mawangun Gita, ngangge Basa Sanskerta kakawi olih Rsi Walmiki (Balmiki), punika saking wastan alas ring pantaraning Tukad Kusa miwah Lawa. Punika kadadosang biseka Gita Ramayana. Punika wantah kamanggehang pinih riin pisan (2007: 13).

Mungguing daging Gita Ramayana inggihan punika kapalih dados pitung (7)  paos, paosannyane soang-soang punika mawasta Kanda. Mawinan taler kabaos saha kawastanin Sapta Kanda. Punika sane kaiket mawangun Gita, tur katahipun 24.000 sloka. Mungguing kawentenan Sapta Kanda punika luir ipun: (1) bala kanda, (2) ayodhya kanda, (3) aranya kanda, (4) kiskindha kanda, (5) sundara kanda, (6) yuddha kanda, miwah (7) uttara kanda. Indik daging satunggil kanda saking paosan Sapta Kanda inucap pacang kapidartayang ring sor puniki.

2.1.1    Bala Kanda

            Bala Kanda wantah kanda sane pangawit gumanti nyritayang Sang Prabhu Dasaratha sane nyeneng ratu ring Panegara Kosalia, kuta rajane mawasta Ayodhya. Ida Sang Prabhu madue prameswari tetiga, minakadinnyane: Dewi Kekayi, Dewi Sumitra, miwah Dewi Kausalya.

            Dewi Kausalya maputra Sang Ramadewa, Dewi Kekayi maputra Sang Bharata, miwah Dewi Sumitra maputra kembar lanang-lanang inggih punika Sang Laksmana miwah Sang Satrugna.

Sasampune Sang Rama miwah arinidane duur, raris kauruk olih Bhagawan Wasistha, tur sami raja putra punika wikan wiadin pascat ring sapauruk Ida Sang Pandita.

Sang Rama miwah Sang Laksmana kaloktah ring jagate pascat ring aji papanahan, turmaning susila-sulaksana. Punika mawinan sang raja putra kalih inucap kapinang (kalamar) olih Bhagawan Wiswamitra, sang maraga tapaswi mapasraman ring gunung alas, mangda sang raja putra makakalih kayun dados prakantin Ida para tapaswine ring pasraman, pacang nulakang sahananing baya miwah panyengkalene saking raksasa wadwan Sang Rahwana, pinaka agunge ring Lengkapura.

Ida Sang Rama miwah Sang Laksmana, mrasidayang  ngaonang raksasa-raksasane sane nguragada wiadin ngusak-asik sang tapaswi, minakadinnyane: Sang Marica sane ketes kasabatang  antuk panah angin nglinus, tiosan ring punika Si Raksasi Tataka taler prasida padem malarapan antuk pegat baongipune.

Sang Rama miwah Sang Laksmana lunga ka negara Metila, ngamiletin swayambara (sewamara), tur mapamuput ngeniang Dewi Sita pinaka pikolihidane. Dewi Sita punika wantah putran Sang Prabhu Janaka, sang jumeneng natha ring Metila.

2.1.2    Ayodhya Kanda

Ayodhya Kanda puniki nyritayang indik Sang Prabhu Dasaratha ngicenin kaprabonida ring Sang Rama, sakewanten kapialangin olih Dewi Kekayi. Dewi Kekayi eling ring pasobayan Ida ring Sang Prabhu duke riin, sadaweg Ida kareremih pacang kaalap rabi. Duaning Sang Prabhu gumanti satya wacana, sapunika taler Ida Sang Rama dahat subakti ring aji, punika mawinan susrusa kayun Ida ngwangdeyang pacang nampenin kaprabone, saha lunga masusupan ka alase sane suennyane 14 (patbelas) warsa.

Ida Sang Rama kairing olih rabi lan arinida masusupan ring tengahing alas-gununge. Wiakti purusa sura-dira sang tiga nepetin wacana miwah ngamargiyang swadharman sang maraga rabi lan rumaga ari.

Sakewanten ring Puri Ayodhya, kacritayang Sang Dasaratha kasuen-suen seda antuk banget nandang panyungkan minakadi kayun Ida kalintang sungsut. Sang Bharata ngruruh rakanida inggihan punika Sang Rama, mangda Ida kayun mantuk ka puri saha nyeneng natha. Sang Bharata nguningayang indik kawentenanne ring Puri Ayodhya, yening I aji sampun ndewata. Punika mawinan Sang Bharata kedeh  mapinunas ring rakane, mangda kayun ugi mantuk ka Ayodhya ngentosin Ida I aji sane sampun maraga raja dewata (almarhum), pacang nglinggihin singasana kaagungane. Sakewanten, Sang Rama nenten nglinggihin pinunas arine, tur midartayang wantah Ida ngamanggehang satya wacana, mangda nenten kabaos alpaka guru rupaka.

            Malarapan antuk ledang kadulurin welas asih kayun Ida Sang Rama, raris Ida mapaica pitutur ring arine indik pemerintahan (rajaniti) miwah tata susilaning sang rumaga ksatria. Paindikane punika raris kaloktah mawasta: Nitisastra. Pamuputnyane kadurusang Sang Bharata ngiringang baos rakane, mangda kayun Ida jumeneng agung ring Ayodhya, malarapan antuk nyungsung padukanida Sang Rama.

2.1.3    Aranya Kanda

Aranya Kanda puniki nyritayang indik Ida Sang Rama, Dewi Sita, lan Sang Laksmana sampun jenek malinggih ring alas Dandaka, mrakantinin para tapaswine sami. Sang para tapaswi dahat ledang santukan kagebeg olih sang tiga, turmaning banget andel kayun para tapaswine antuk kapradnyanan kalih kaplapanan kayunida sang tiga.

Kacritayang sadaweg ring tengah alase, Sang Rama kagoda olih Raksasi Surpanaka (arinida Sang Rahwana). Sang Surpanaka katues irung lan karnandane santukan makayun jaga ngrusak Dewi Sita, duaning kaparna wantah Ida Dewi Sita sane mamialang kayundane pacang ngreremih Sang Laksmana.

Irika taler kacritayang indik kapademanipun I raksasa tiga nenten wenten tios Sang Kara, Sang Dusana, lan Sang Trisirah. Makatiga punika wantah rabin Sang Raksasi Surpanaka. Indik kapademannyane punika kandugi katuruningayang majeng ring Ida Sang Prabhu Rahwana. Tiosan ring punika, Sang Surpanaka taler nguningayang indik kaayon Dewi Sitane, sane dahat  anut yening kaalap rabi olih Ida Sang Prabhu Rahwana.

Wau kapireng panguningipun I raksasi sakadi asapunika, kandugi bendu tur kasmaran kayunida Sang Rahwana. Santukan asapunika raris Ida ngutus Ki Patih Marica mangda ngiringang lunga ka pasraman ring linggihida Sang Rama.

Sang Marica kandikayang mangda nyuti rupa dados kidang mas, pacang mencanen Sang Rama, mangda dangan antuk mandung Dewi Sita. Irika raris Sang Rama keni kadaut kayunidane antuk wiweka Sang Marica sane nyuti rupa dados kidang mas. Indike punika santukan pacang nagingin pakayunan Dewi Sita mangda rabine ngejuk kidang mase punika, taler mangda kaaturang ring Dewi Sita, sakewanten Ida Dewi Sita kajaga olih Sang Laksmana.

Ring tengah alase, kacritayang Sang Rama prasida manah kidang mase sane yuktinnyane wantah Sang Marica, ri kala punika Sang Marica nyuti baos Sang Rama saha ngame-ame Dewi Sita malarapan tulung-tulung sakadi sang sane pacang seda, wus punika raris Sang Marica Padem.

Dewi Sita sane mireng suara punika raris kosekan ring kayun samaliha ngnikain Sang Laksmana mangda prasida lunga mapitulung ring rabinida. Santukan Sang Laksmana nenten gelis ngamargiang sapituduh Dewi Sita, punika mawinan menggah Ida Dewi Sita, raris kabaosang Sang Laksmana wantah ari sane nenten susrusa ring raka samaliha kabaosang pacang mapakayunan ngambil Dewi Sita sasampun Sang Rama seda antuk Sang Marica.

Pamuputnyane, antuk banget bendu samaliha pakayunan Ida wantah nagingin pituduh Dewi Sita, sadurung ngruruh rakane, irika raris Sang Laksmana makarya sengker jaga satru ring Dewi Sita. Sapasira ja nenten mrasidayang nglintangin sengkere punika, santukan sakadi asapunika, irika raris Sang Rahwana makarya wiweka pacang mandung Dewi Sita, malarapan antuk nyuti rupa dados wiku kanggen nudut kayun Ida mangda medal saking sengker sane kakaryanin olih Sang Laksmana.

Pamuputnyane Dewi Sita prasida kapandung olih Sang Rahwana, nglantur payudane ring Sang Jatayu, kantos Dane ngemasin seda antuk maprabela ring Sang Rama.

2.1.4    Kiskindha Kanda

Kiskindha Kanda punika dagingnyane nyritayang indik patulungida Sang Rama miwah Sang Laksmana majeng ring Sang Kapiraja Sugriwa, nyedayang Dane Sang Subali. Wiwilannyane inggih punika parebat Sang Subali ring Sang Sugriwa marebutin Dewi Tara, kandugi raris kandisan Sang Sugriwa.

Duaning keni panah utama antuk Ida Sang Rama, mawinan ngemasin antaka Dane Sang Kapiraja Subali. Ri kanjekane punika raris Sang Sugriwa mawali madeg kapiraja (raja kera), raris Dewi Tara kaadegang pinaka prameswarindane.

Mungguing Sang Wenara Anggada (putran Sang Subali) kaadegang manados juaraja (putra mahkota) olih Dane Sang Kapiraja Sugriwa. Taler kacritayang bala wenarane ngruruh Dewi Sita nyujur Jagat Lengkapurane, samaliha kacritayang sampun rauh ring pasisi.

2.1.5    Sundara Kanda

            Mungguing dagingipun nyritayang Sang Hanoman makecog rauh ring Lengkapura, tur mautsaha ngruruh Dewi Sita. Sasampune kapangguh, samaliha sampun Dane nguningayang kawentenan Ida Sang Rama ring Gunung Resyamuka, raris Dane Sang Hanoman ngaturang ali-ali paican Sang Rama majeng ring Ida Dewi Sita. Ali-ali punika wantah nyihnayang Sang Rama kantun nyeneng. Ali-ali punika kawasdadayang pisan. Sasampunne tatas kauningin antuk Ida Dewi Sita, raris Dewi Sita ngwales micayang sewala patra mangda katurang mantuk ring Ida Sang Rama.

Sasampun sewala patra punika katunas olih Dane Sang Hanoman, tumuli Dane ngrincikang wiweka, mangda yukti-yukti Dane macihna maraga utusan utama. Kala irika raris Dane nyujur ka taman Lengkane, praya ngrempak taru-tarune sane nguparengganin tetamanan punika. Katah tarune sane balbal olih Dane, makadi taru parijata, angsana, sandat miwah sane lian-lianan keni kausak-asik kandugi telas nenten pagantulan. Kala irika Dane keni kaejuk antuk para pangebage ring tetamanan punika.

Sang Hanoman kabasta turmaning untat Dane kakaput antuk eduk sane kasiram minyak, tumuli katunjelin. Irika raris Dane nyihnayang dados utusan utama, duen Ida sang maraga utama. Raris Dane makecog mriki-mrika ring kereb-kereb wewangun purine, mawastu geseng kawentenane irika, kadilah antuk genine. Sawusan punika Dane digelis mawali budal, nyujur linggih Ida Sang Ramadewa, praya nguningayang buat pamargin Danene pinaka utusan nyelehin linggih Ida Dewi Sita. Sakewanten Dane Sang Kapiraja Sugriwa digelis ngrincikang wiweka mangda mrasidayang nglintangin segarane ka Lengkapura, Dane mapakayun pacang makarya situbanda, sane ketah kabaos "Titi Banda".

2.1.6    Yuddha Kanda

            Yuddha Kanda puniki nyritayang indik bala wenarane makarya situbanda (kreteg = jembatan), pacang nglurug  Jagat Lengkane. Taler kacritayang Sang Ramadewa kairing antuk bala wenarane ngwentenang peparuman. Sasampune puput pawilangane, raris kakawitin yudane, inggih punika payudan Sang Rama majeng ring Sang Rahwana, sane kawantu olih Dane Sang Wibisana. Makapamuput, Sang Rahwana seda ring payudan malarapan antuk purusa sura direng jurit.

            Pinaka pangentos Sang Rahwana jumeneng agung ring Lengka, raris Sang Punta Wibisana kaadegang prabhu nyakrabumi irika. Ida Sang Wibisana taler kaloktah maparab Sang Gunawan Wibisana. Irika raris Sang Ramadewa mapaica piteket ring Sang wau kaadegang agung ring Lengkapura, gumanti dagingnyane nganinin indik sapratingkahing sang ngamong jagat. Piteket punika kasub mawasta: "Asta Brata", gumanti gegelaran sang ngamong.

            Salanturnyane taler kacritayang Dewi Sita malabuh geni, nyihnayang raga kantun maraga suci nirmala, santukan kantun olih Ida Sang Rama. Duaning yukti-yukti Ida Dewi Sita kantun suci, mawinan nenten wenten angan samatra anggan Idane keni dilahan geni. Sasampune wusan Dewi Sita nyuciang raga malarapan antuk malabuh geni, raris Ida Sang Rama, Dewi Sita, lan Sang Laksmana mantuk ka Puri Ayodhya, saha kairingang olih Sang Wibisana, Sang Kapiraja Sugriwa, miwah Dane Sang Hanoman.

             Sarauh Ida makasami ring Puri Ayodhya, kala irika raris Sang Bharata nyerahang kaprabon ring Ida Sang Ramadewa.

2.1.7    Uttara Kanda

            Uttara Kanda puniki nyritayang indik sasampune Ida Sang Ramadewa madeg agung. Yadiastun kawentenan panegarane sampun kerta raharja malarapan antuk kawicaksanan kalih kapradnyananida, Sang Rama ngenterang jagat, sakewanten kayunidane kantun taler sungkawa, antuk kantun sumelang ring kasucian angga sariranida Dewi Sita, duaning polih kapandung olih Sang Rahwana.

            Punika mawinan Dewi Sita kakutang ring tengahing alas, ring pantaraning Tukad Kusa miwah Tukad Lawane, sane tampek ring genah pasraman Bhagawan Walmiki (Balmiki). Ida Dewi Sita kaduduk kanggen putra olih Sang Bhagawan. Daweg punika Dewi Sita sedek mobot, tur sampun ayat embas.

Katepengan pisan dawege punika Bhagawan Walmiki ngiket palambang (kakawian), sane nyritayang indik pamargin Sang Ramane, sane sampun kaloktah mawasta: Ramayana. "Rama" mateges Ida Sang Ramadewa, "yana" mateges pamargi (polih pangater a-). Dadosnyane Ramayana mateges pamargin Ida Sang Ramadewa.

            Kala punika Dewi Sita madue putra kembar lanang-lanang kakalih, maparab Sang Kusa miwah Sang Lawa. Anake alit kalih diri punika kaupapira saha kaupaayu olih Bhagawan Walmiki, kauruk indik ulahing Sang Ksatria.

            Tiosan ring punika, Ida Sang Ramadewa ngwentenang Karya Agung Rajasuya inggih punika karya pabisekan Ida madeg agung maka raja di raja (maharaja). Duaning asapunika Ida Sang Ramdewa sampun nglimbakang pinangan (undangan) majeng ring para Bupati, para Rai, para Sujana-sujana kalih para pretakjana sami. Tan lempas Ida Bhagawan Walmiki karauhan pinangan Ida Sang Rama. Riantukan asapunika, Ida Bhagawan mapikarsa pacang ngrauhing paminang Ida Sang Rama, kaairing olih Sang Kusa miwah Sang Lawa.

            Ida Sang Kusa miwah Sang Lawa ngwacen daging kakawian Ida Bhagawan Walmiki sane mawasta: RAMAYANA, kandugi kagegaok Sang Rama mirengang kalengutan daging kakawian punika, inggian kapascatan sang kalih ngwacen wiadin negesin daging kakawian punika, kaembadang daging pamargin saha panyenenganidane. Punika mawinan Ida Sang Rama ngelingin saha nunas anake alit sane pinaka putranida, kadulurin antuk atur panyuksma majeng ring Bhagawan Walmiki.

            Dewi Sita kandikayang mangda kayun mawali jumeneng prameswari, sakewanten Ida Dewi Sita nenten ngiringang, tur ngranjing ring pangkon pertiwine. Sang Rama micayang kaprabonida majeng ring putranida makakalih, tur Ida mantuk ka Wisnuloka.

            Dadosnyane, Kakawin Ramayana miwah Gita Ramayana kakawian Ida Bhagawan Walmiki (Balmiki) punika wenten sesamennyane, sakewanten wenten taler binanipun. Sesamenipun inggih punika sami nyritayang kautaman panrestian miwah pamargin Ida Sang Ramadewa. Mungguing binanipun, Kakawin Ramayana wantah madaging nemnem (6) kanda sane mawiwit saking Ravanawadha, inggihan punika wantah rauh ring sadakala Ida Sang Rama sampun rauh ring Puri Ayodhya. Sakewanten yening Gita Ramayana madaging pitung (7) kanda, ring Uttara Kanda (Kakawian Ida Bhagawan Walmiki) kajantenang Dewi Sita kakutang ring alas tampek ring Pasraman Bhagawan Walmiki. Punika wantah marupa palawakia. Kakawin sane saih kadi daging Uttara Kanda mawasta Ramatantra utawi Kakawin Satrugna. Ramatantra tegeseipun: pandirinida (pemerintahan) Sang Rama.

Inggih sakadi asapunika prasida antuk titiang midartayang samatra kawentenan daging susastra Ramayanane, sane pecak kakawi olih Ida Bhagawan Walmiki. Sayuakti daging susastra Ramayana punika kalintang asri samaliha madaging basa sane lengut gumanti nyihnayang kotaman sang pradnyan pinaka pangawi agung duke riin.

Wusan punika, sane mangkin pacang kaaturang indik daging susastra Mahabharata. Mangda tatas indik dagingipun, durus pratiaksayang pidartan ring sor puniki.

2.2       Daging Susastra Mahabharata

            Tiosan ring Ramayana, wenten malih pustaka suci sane mawangun Itihasa (katuturan sang ksatria wireng jurit = epos) inggih punika ketah mawasta: Mahabharata. Mahabharata punika kapalih dados plukutus (18) paos, mawasta: Astadasa Parwa. Sakadi Ramayana, mahabharata punika taler mawangun Gita, sasampune rauh ring Jagat Nusantara punika kauah kadadosang Parwa-parwa (marupa sloka padarta).

            Ring Gita Mahabharata katah slokannyane inggih punika 100.000 sloka.  Daging critannyane mawarna-warni. Astadasa Parwa punika nyritayang katuturan Ida Sang Panca Pandawa miwah Sang Satus Korawa (Gautama, 2007:21).

Ring Astadasa Parwa punika madue perangan inggihan punika sane mawasta Bharata Yuddha, sane nyritayang payudan Sang Pandawa miwah Korawa, sane masue plekutus (18) wengi utawi rahina.

            Mahabharata kapupulang kalih kaiket olih Bhagawan Byasa, taler madue pesengan Bhagawan Kresnadwipayana. Ida malinggih ring Badrika Asrama ring Gunung Himalaya. Suen Ida ngripta pustaka punika tigang (3) warsa. Kakawian Ida punika kawitnyane mawangun Gita, tur ngangge Basa Sanskerta, sasampune rauh ring Nusantara, sloka punika kakantenang samatra, salanturnyane kauah kalih kagentosin antuk Basa Kawi (Jawi Kuna), mangda prasida kauningin antuk para janane, santukan punika wantah pustaka Hindu.

Mungguing kawentenan perangan Astadasa Parwane sane kaiket olih Bhagawan Byasa inggih punika: (1) adi parwa, (2) sabha parwa, (3) aranyaka parwa (wana parwa), (4) wirata parwa, (5) udyoga parwa, (6) bhisma parwa, (7) drona parwa, (8) karna parwa, (9) salya parwa, (10) sauptika parwa, (11) stri parwa, (12) santika parwa, (13) anusasana parwa, (14) aswamedha parwa, (15) asramawasika parwa, (16) mosala parwa, (17) prasthanika parwa, miwah    (18) swargarohana parwa.

            Sane mangkin, mangda tatas antuk daging soang-soang parwane sajeroning Astadasa Parwa punika, ngiring pratiaksayang pidartan ring sor puniki.

2.2.1    Adi Parwa

            Parwa sane kapertama puniki nyritayang indik kawit kawentenan wangsa Bharatane, pamuteran Gunung Mandara (Mandara Giri), kawentenan Bhagawan Dhomya sane nureksain para sisyanidane sane mapesengan Sang Utangka, Sang Utamanyu, miwah Sang Weda. Taler nyritayang indik wetun para naga miwah sang garuda, pawijilan Sang Pandawa miwah Satus Korawa, mijilnyane Rsi Byasa, raris crita kahanan Pandawa kalih Korawa sadawege kantun alit, nglantur pademnyane raksasa Hidimba ring Sang Bima, sakewanten arindane raksasa Hidimba sane maparab Sang Hidimbi kanggen rabi olih Ida Sang Bima.

Ring parwa puniki taler kacritayang indik kahanan Ida Sang Arjuna sane mapikolih ring sewamara, kantos ngeniang Dewi Drupadi. Pamuput parwane puniki nyritayang indik crita Ida Hyang Agni ngeseng Alas Kandawane (Andakawana), sane kakantinin olih Ida Sang Kresna miwah Sang Arjuna.

2.2.2    Sabha Parwa

            Parwane sane kaping kalih puniki nyritayang indik Sang Pandawa ngwangun puri ring Indrawiprasta, Sang Pandawa ngwentenang dyuta mawastu kaon Sang Panca Pandawa. Indike punika duaning antuk kakaonan wiwekandane Sang Sangkuni, raris dyuta punika kapikolihang ping kalih olih Korawa, Santukan asapunika manut semaya, Sang Pandawa patut lunga ngenes ring alas gununge masue roras (12) warsa, turmaning sawusan punika nenten dados katangehan. Yening prade wenten sane ngatrayang wiadin ngelingin, patut ngwalinin malih masusupan ring jeroning alas. Ring warsa kaping telulas (13) Sang Pandawa patut nyingidang raga, yadiastun dados nenten ngenes ring alas gununge.

2.2.3    Aranyaka Parwa (Wana Parwa)

            Parwa sane kaping tiga puniki dagingnyane nyritayang indik sadawege Sang Panca Pandawa ngranjing ring sajeroning alas, nyritayang indik saparipolah Sang Panca Pandawa kasarengin Dewi Drupadi ngenes ring alase.

 Sane pinih mabuat pisan ring daging parwane puniki inggih punika wantah taler nyritayang indik kawentenan Ida Sang Arjuna sane ngwangun tapa ring Gunung Indakila (Himalaya), ri tatkala pacang ngruruh senjata pasupati saking Ida Bhatara Siwa. Indiki punika sane ngwetuang crita sane kanggit ring Kakawin Arjuna Wiwaha olih Ida Mpu Kanwa.

Raris mungguing pamuput Ida Sang Pandawa miwah Dewi Drupadi ngenes ring alase kantos ngwentenang utsawa. Taler kacritayang indik panureksan Ida Sang Hyang Dharma majeng ring Sang Yudhistira.

2.2.4    Wirata Parwa

            Parwa sane kaping patpat puniki nyritayang pidabdab Ida Sang Panca Pandawa miwah Diah Drupadi nyaru (nyineb kaagungan), saha mamarekan ring Ida Sang Prabhu Wirata, mangdane nenten katangehang olih Sang Korawa. Ri kanjekane punika, Ida Sang Yudhistira nyaru manados juru ajah indik tatwa miwah agama, Sang Bima manados juru rateng, sane makarya ratengan sarahina-rahina ring parantenan , duaning antuk seneng Ida majengan. Raris Sang Arjuna nyaru manados guru pragina tari sane pakantenanida sakadi anak bancih, mapaica ajah indik sasolahan. Sang Nakula nyaru manados pakatik, ngupapira jaran sane wenten ring puri. Sang Sahadewa nyaru manados pangangon, mungguing Dewi Drupadi nyaru manados juru payas.

Ring parwane puniki taler kacritayang indik Sang Patih Kisaka seda, antuk palaksanan Dane majeng ring Sang Sarandri (samaran Diah Drupadi), nglantur lembu duen Sang Prabhu Wirata kabaak. Mapamuput antuk pawiwahan Ida Sang Abhimanyu ring Diah Uttari putran Ida Prabhu Wirata.

2.2.5    Udyoga Parwa

Parwa sane kaping lima puniki nartayang indik wangsa Bharatane nyayagayang raga pacang mayuda ring Kuruksetra. Ida Sang Kresna sane mautsaha ngrumrum para Korawane mangda ugi nenten ngwentenan yuda, sakewanten nenten kalinguang. Taler nglantur indik Ida Sang Arjuna miwah Sang Duryodhana nanginin Ida Sang Prabhu Kresna ri kala sirep, duaning maka sareng kalih mamuatang pacang nunas kanti ring Ida Sang Prabhu Kresna, inggihan punika pacang kaaturin dados senapati. Raris Ida Sang Prabhu Kresna ngicenin pilihan inggih punika milih Ida punapi prajurit Ida. Sang Duryodana sane matadah momoan kapertama nunas prajurit Ida, sakewanten Sang Arjuna nunas mangda ugi anggan Ida sane nyarengin Sang Arjuna ring payudan.

Pandawa lan Korawa ngrereh kanti samakehipun ring sakuub jagat Bharatawarsa, sakuub panegara India kuna kapalih dados kalih baga.

            Tiosan ring punika taler nyritayang panrestian Ida Dewi Amba manados Sang Sikhandi (Srikandi).

2.2.6    Bhisma Parwa

            Parwa sane kaping nemnem puniki wantah kawitnyane nyritayang indik ring kahananing payudan ring Kuruksetra. Sajeroning sinalih tunggil bagannyane wenten bebaosan suci Ida Sang kresna ring Sang Arjuna ri tatkala yudane jagi kakawitin.

Ring parwane puniki taler kacritayang nganinin indik Ida Bhagawan Bhisma madeg senapati mrakantinin Sang Korawa, mapamuput antuk sedan Ida kapanah olih Sang Srikandi, sane kaabih antuk Sang Arjuna. Sadaweg punika Ida Sang Rsi Gangga (Bhisma) nenten tulus seda, santukan kantun nyantos pamargin suryane ngutarayana (ngambahang kaja). Ida Sang Rsi merem ring luuring saratalpa (tumpukan panah), sinambi mapaica pawarah-warah ring Ida Sang Dharmawangsa (Yudhistira).

2.2.7    Drona Parwa

            Parwa sane kaping pitu puniki nyritayang indik Bhagawan Drona madeg senapati ring Korawa, mapamuput antuk kasedayan Ida, kaprajaya olih Sang Drestadyumna, ri tatkala Ida sedeng sedih nguntul nangis santukan miragi okanida Sang Aswatama  seda, sakewanten Aswatama punika wantah adan gajah senapati korawane sane kapademang olih Sang Bima.

Ring parwa puniki taler nyritayang indik sedan Sang Abimanyu sane karebut olih Korawa makamiwah sedan Sang Gatot Kaca olih Sang Karna.

2.2.8    Karna Parwa

            Parwa sane kaping kutus puniki nyritayang indik sedan Ida Sang Dursasana olih Sang Bima, taler nartayang paindikan Ida Sang Awanggadipati (Sang Karna), madeg senapati ring posan Korawa, Prabhu Salya dados kusir kreta perange (Sarati), makapamuput kasedayan Ida Sang Karna olih Sang Arjuna antuk sanjata pasupati ring rahina kapitulas.

2.2.9    Salya Parwa

            Parwane sane kaping sia puniki nartayang indik Sang Prabhu Salya madeg senapati ring Korawa, mapamuput antuk kasedayan Ida ring rananggana (payudan) olih Sang Prabhu Dharmawangsa malarapan antuk senjata Kalimosada.

Dewi Satyawati (prameswarin Ida Sang Salya) ngamargiang satya suami, malarapan antuk nuek angga.

            Parwa puniki taler nyritayang Sang Prabhu Duryodhana atanding jurit (perang tunggalan) majeng ring Ida Sang Werkodara (Bhima), wastu keni kalantig pupun Ida Sang Prabhu Duryodhana, mapamuput antuk kasedayan Ida Sang Prabhu Duryodhana, sakewanten sadurung seda Ida nitahang Sang Aswatthama dados senapati Korawa.

2.2.10  Sauptika Parwa

Parwa sane kaping dasa puniki nartayang  Nartayang paindikan Ida Sang Aswatthama, Bhagawan Krepa, miwah Sang Krtawarma, rikala wengi ngamuk ring pondok (kubu pertahanan) Sang Pandawane, raris nyedayang Sang Panca Kumara (putran Sang Pandawa makalelima), Sang Sikhandi, Sang Drestadyumna miwah sane lianan. Wusan punika Sang Aswatthama malaib nyerahang angga ring Bhagawan Byasa.

Raris benjangne Sang Aswatthama kauber olih para Pandawa nyantos kawentenang yuda sareng Sang Arjuna, mawastu Ida kandisan olih Sang Arjuna. Raris pikobete punika kapuputang olih Ida Bhagawan Byasa kalih Sang Kresna, nglantur ring embas Ida Sang Parikesit.

           

2.2.11  Stri Parwa

            Parwa sane kaping solas puniki nyritayang indik panulamen para rabi ksatriane sane seda ring payudan, maduluran tangisnyane nenten papegatan, tur mapamuput antuk ngwentenang Pitra Yadnya, inggih punika Upacara Palebon mantuke ring para prajurit ksatria sane seda ring rananggana.

Ring parwa punika taler Ida Dewi Kunti nartayang indik kawentanan Sang Karna sane nenten sios wantah rakan Sang Panca Pandawa.

2.2.12  Santika Parwa

            Parwa sane kaping roras punika nartayang indik mapupulnyanearastr Sang Drestarastra, Gandari, Panca Pandawa, kalih Sang Kresna ring Kuruksetra. Ida sareng sami maselselan sasampun Bharata Yudane kalaksanayang. Sang Yudhistira sane pinih ngrasayang penyungkan kayun santukan sampun nyedayang guru kalih sametonidane.

Pamuputnyane Sang Yudhistira mpaica ajah lan piteket sane suci olih Bhagawan Byasa miwah Sang Kresna. Ida sareng kalih nartayang indik wiwilan makami tetujon ajahan Hindu mangda Sang Yudhistira  mrasidayang nglaksanayang sesananing manados pangwawa jagat, ratu ring Hastinapura.

2.2.13 Anusasana Parwa

Parwa sane kaping telulas puniki nyritayang indik Ida Sang Yudhistira nyerahang angga pacang nunas ajah ring Ida Sang Bhisma. Bhagawan Bhisma sane kantun wenten ring saratalpa mahbahang indik piteket Agama Hindune, tur indik praja niti, dharmanaing niti sesana, miwah ngruruh karahayuan ring jagate, miwah parindikan mautama sane siosan.

Mungguing pamuput critane puniki, kacritayang Ida Bhagawan Bhisma mangkat ngungsi Suarga.

2.2.14 Aswamedha Parwa

Parwa sane kaping patbelas puniki nartayang indik embas Ida Sang Pariksit sane polih kasedayang olih Sang Aswatama ri tatkala kantun wenten ring garbaning Dewi Uttari, sakewanten prasida kauripang malih olih Ida Sang Kresna.

Parwa punika taler nartayang indik Sang Yudhistira nglaksanayang Aswamedha Yadnya, ri tatkala punika Ida ngelebin jaran asiki sane mangumbara salami atiban tur jaran punika katuut olih Ida Sang Arjuna. Panegara sane kalintangin olih jaran lan Sang Arjuna mangda kasor ring linggih Ida Sang Yudhistira, pamuput yadnya punika sakuub panegara ring jagat India ngankenin Sang Yudistira pinaka ratuning para ratu.

2.2.15 Asramawasika Parwa

Parwa sane kaping limolas puniki nyritayang sadaweg Sang Drestarastra kasarengin olih Dewi Kunti, Sang Sanjaya miwah Sang Widura, lunga ka tengahing alase. Ri sampun wus sakadi asapunika, Ida sareng patpat kasuen-suen raris seda.  Ngwikanin indike punika, raris Bhatara Narada tedun ngrauhin Sang Yudhistira ngenikaang Ida sareng patpat sampun malecat ka surgan, duaning kageseng antuk geni sane mawit saking kasucian Ida sareng patpat.

Pamuput nyane sadaweg Sang Yudhisthira ngawentenang Upacara Pitra Tarpana, mantuka ring Ida maka patpat.

2.2.16 Mosala Parwa

Parwa sane kaping nembelas puniki nyritayang indik kapunahan Wangsa Yadu miwah Wresnine ring Dwarapati, inggih punika para panjak lan waduan Ida Sang Baladewa miwah Sang Prabhu Kresna, indike punika mawit sangkaning pamastun Ida Sang Brahmana sane kauluk-uluk olih Sang Samba, irika ipun mapi-mapi dados anak abot tur mataken ring Sang Brahmana, sapunapi ke warnin rare sane pacang embas punika, lanang punapi istri. Sakewanten  Sang Brahmana punika sampun uning tur kroda raris ngamedalang pamastu mangda wangsa Yadu lan Wrisni pacang rug olih besi sane kaanggen nguluk-uluk Ida. Punika mawinan wusan ngwentenang utsawa raris lipia ring angga sareng sinamian tur mayuda ngangge gada (mosala).

Wus punika Ida Sang Baladewa raris nyraya ring tengahing wana turmaning kajaba ula suci saking cangkem Idane pinaka pramanan Idane sane nuju suarga loka. Sapunika taler Ida Sang Kresna, sasampun rug wangsanida, Ida taler ngusi wana. Ring tengahing wana telapakan cokor Ida kakantenin kidang, raris kapanah antuk tukang boros. Punika gumanti sangkaning pamargin Ida nuju Wisnu Loka.  Mapamuput antuk Bhagawan Byasa mapaica dharma pitutur ring Sang Arjuna mangda Sang Panca Pandawa ngemargiang wanaprasta.

2.2.17  Prasthanika Parwa

            Parwa sane kaping pitulas puniki nartayang nganinin indik sadaweg Sang Panca Pandawa miwah Dewi Drupadi nilar negara, lunga ka pasraman, tur   nyukserahang panegara ring Ida Sang Parikesit, raris mapamuput antuk seda sakasiki, sakewanten Sang Dharmawangsa nenten seda.

Kacritayang ring tengahing margi Sang Dharmawangsa manggihin asu sane satata ngetut pamargin Ida kantos ring Puncak Gunung Himalaya sane pinaka margi ka suarga loka. Raris ri sasampune rauh ring ajeng suarga Ida Sang Dharmawangsa  kapendak olih Bhatara Indra.

2.2.18  Swargarohana Parwa

Parwa sane kaping untat puniki nyritayang indik pamargin Ida Sang Panca Pandawa miwah Dewi Drupadi molihang suarga, manut kadi phalakarman nyane soang-soang. Ring parwa puniki kakawitin saking Bhatara Indra nitahang  Sang Yudistira (Dharmawangsa) mangda asu sane nyarengin Ida katinggal santukan asu nenten dados ngranjing ka suarga loka, nanging Sang Dharmawangsa nenten kayun santukan asu punika sampun satia nyarengin ida. Raris asu punika nyuti rupa dados Bhatara Dharma. Raris Ida polih wara nugrahan utama saking Ida Bhatara Dharma, tur nglantur molihang suarga. Sakewanten sasampune rauh ring suarga, Sang Dharmawangsa tangkejut pisan santukan sane panggihin Ida wantah satus Korawa. Ida nakenang parindikan punika, Ida Bhatara Indra ngenikayang Korawa punika polih suarga santuka Sang Satus Korawa seda ring rananggana. Ring genah sane matiosan, cingakin Ida mungguing sameton Idane kalih Dewi Drupadi wenten ring neraka. Irika raris Ida Sang Dharmawangsa kanikain mangda ngaturang pakayunanida antuk milih sinalih tunggil genah sane pacang linggihan Ida, suarga genah Ida satus Korawa, punapi ring neraka genah sameton kalih rabinida.

Sang Dharmawangsa raris nunas manda Ida kasarengang ring sameton Idane sami sane wenten ring neraka, ri wus asapunika raris magentos nerakane manados suarga, suargane dados neraka, wusan punika Ida raris nglebar layonidane ring segara.

Inggih sakadi asapunika mungguing daging ringkes Astadasa Parwa sane prasida aturang titiang. Duaning antuk makatah pisan dagingnyane sajeroning soang-soang punika, nenten prasida raris nartayang antuk jangkepnyane. Dumogi makasami daging ringkes punika prasida ngledangin kayun saha mabuat ring kawentenan pakibeh susastra Baline.

SARGA III

PAMUPUT

3.1       Pacutetan

Nganutin pidartan sajeroning daging selehan ring luur, dadosnyane prasida kacutetang mungguing kawentenanipun sakadi ring sor puniki.

Ramayana miwah Mahabharata sane sampun kaloktah punika wantah kasusastran sane mawit saking Kasusastran Hindu. Kakawin Ramayana punika wantah kakawin sane pinih riin karipta ring Nusantara. Susastra Ramayana sujatinnyane wenten kalih perangan inggih punika wenten sane marupa Kakawin Ramayana miwah sane marupa Gita Ramayana. Makakalih punika wantah kakawian Ida Bhagawan Walmiki (Balmiki). Taler makakalih dagingnyane nyritayang indik kautaman panrestian miwah pamargin Ida Sang Ramadewa. Mungguing binanipun, Kakawin Ramayana wantah madaging nemnem (6) kanda sane mawiwit saking Ravanawadha, inggihan punika wantah rauh ring sadakala Ida Sang Rama sampun rauh ring Puri Ayodhya. Sakewanten yening Gita Ramayana madaging pitung (7) kanda, mawinan kawastanin Sapta Kanda. Mungguing kawentenan Sapta Kanda punika luir ipun: (1) bala kanda, (2) ayodhya kanda, (3) aranya kanda, (4) kiskindha kanda, (5) sundara kanda, (6) yuddha kanda, miwah (7) uttara kanda. Pawewehnyane ring Gita Ramayana wantah kanten sajeroning Uttara Kanda (Kakawian Ida Bhagawan Walmiki) kajantenang Dewi Sita kakutang ring alas tampek ring Pasraman Bhagawan Walmiki.

            Mahabharata inggih punika susastra Bali sane taler pinaka Kasusastran Hindu sane marupa Itihasa. Pecaknyane kakawi olih Ida Bhagawan Byasa. Mahabharata punika nyritayang indik katuturan Ida Sang Panca Pandawa miwah Sang Satus Korawa. Mahabharata kapalih dados plukutus (18) paos, mawasta: Astadasa Parwa. Sakadi Ramayana, mahabharata punika taler mawangun Gita, sasampune rauh ring Jagat Nusantara punika kauah kadadosang Parwa-parwa (marupa sloka padarta). Mungguing kawentenan perangan Astadasa Parwane sane kaiket olih Bhagawan Byasa inggih punika: (1) adi parwa, (2) sabha parwa,         (3) aranyaka parwa (wana parwa), (4) wirata parwa, (5) udyoga parwa, (6) bhisma parwa, (7) drona parwa, (8) karna parwa, (9) salya parwa, (10) sauptika parwa, (11) stri parwa, (12) santika parwa, (13) anusasana parwa, (14) aswamedha parwa, (15) asramawasika parwa, (16) mosala parwa, (17) prasthanika parwa, miwah    (18) swargarohana parwa.

3.2       Pangapti

            Saking pidartan inucap raris prasida titiang ngaturang pangapti amatra nganinin indik kawentenan selehan puniki. sayuaktinnyane daging selehan punika tuna paripurna miwah tuna ring daging wirasa basa. Punika duaning antuk kawimudan kalih katambetan titiang  mawinan nenten prasida nartayang daging susastra Ramayana miwah Mahabharata sane jangkep tur paripurna. Tiosan ring puniki, kantun akeh taler sane prasida kaselehin nganinin indik kawentenan Kasusastran Hindune. Punika gumanti nyihnayang kalinguan ring kawentenan kamahatmian budaya Bali sane marupa tetamian saking leluur. Dumogi mlarapan antuk utsaha-utsaha sakadi puniki, susastra Baline prasida nglimbak tur werdi kantos kawekas, lamakane prasida anggen titi pangancan kalih sipat siku-sikuning sajeroning ngarepin aab jagate sakadi mangkin sane ketah kabaos awor tan pawates.